ბორჯომის ტყის აღსადგენად დაწყებული კამპანიის ფარგლებში, ბია 5,000 ხეს დარგავს.

კამპანია „აღადგინე ბორჯომის ტყე“ უკვე ერთ თვეზე მეტია მიმდინარეობს და მისი ოფიციალური ნაწილი 8 აგვისტომდე გაგრძელდება. პროექტის მიზანია 2008 წელს გაჩენილი ხანძრის შედეგად დამწვარი ბორჯომის ტყის სრულად აღდგენა.

დღეის მდგომარეობით, კამპანიას შეუერთდა 150–მდე კომპანია და 2,000–მდე ფიზიკური პირი, თუმცა, დაზიანებული ტყის მასშტაბი იმდენად დიდია, რომ ბიზნესისა და საზოგადოებისგან მეტ ჩართულობას ითხოვს.

„ჩვენთვის ძალიან მნიშვნელოვანია ისეთი მიზანმიმართული და შედეგზე ორიენტირებული სოციალური კამპანიის ორგანიზება, სადაც შედეგი ნათელი და დათვლადია, ბია მართავს საქართველოში მოქმედი აქტიური კომპანიების მონაცემთა ბაზას და გვაქვს ინფორმაცია, რამდენი კომპანია ზრუნავს გარემოზე. კომპანიების სოციალური პროექტების გაერთიანებით, ბევრი სასიკეთო საქმის გაკეთება შეგვიძლია, გვიხარია, რომ კამპანიაში ბევრი სტარტაფი და ისეთი კომპანია ჩაერთო, რომლებიც სოციალური პასუხისმგებლობის კუთხით არ იყვნენ აქტიური, შედეგად, ქვეყანას ერთიანობით მეტ ღირებულებას მოვუტანთ” – აცხადებს „ბიას“ დირექტორის მოადგილე, სალომე კუკავა.

„ბიას“ ბაზაში 26,000-მდე აქტიური კომპანიაა გაერთიანებული, რომელთაგან 1,200–მდე მსხვილი, 5,000–მდე საშუალო, ხოლო 20,000–მდე მცირე კომპანიაა. თუ სოციალური პასუხისმგებლობის ფარგლებში, ყველა კომპანია შესაბამისი რესურსით ჩაერთვება კამპანიაში, შედეგი მარტივად მისაღწევია.

კამპანია „აღადგინეს“ ფარგლებში, ტყის სრულად აღსადგენად 750,000 ხის დარგვა იგეგმება. დღეის მდგომარეობით, უკვე დაირგო 32,250 ხე, კამპანია ოფიციალურად 8 აგვისტოს სრულდება, თუმცა ამ დრომდე შეძენილი ნერგები შემოდგომაზე დაირგვება.

იხილეთ კამპანიაში „აღადგინე ბორჯომის ტყე“ მონაწილე კომპანიების სია