საქართველოში ბორჯომის ტყის სრულად აღსადგენად მასშტაბური კამპანია დაიწყო. კამპანიის ფარგლებში, 750 000 ხის დარგვა იგეგმება. კამპანიის მიზანია, გააერთიანოს ქართული ბიზნესის წარმომადგენლები და ყველა მსურველი ტყის გადასარჩენად. დღეს გამართულ ბრიფინგზე, ხელი მოეწერა ურთიერთთანამშრომლობის მემორანდუმს კომპანია „ბიას“, სტარტაპ „თრიფექსსა“ და ეროვნულ სატყეო სააგენტოს შორის. კამპანია „აღადგინე ბორჯომის ტყე“ ინიციატორია ბია – „ბიზნეს ინფორმაციის სააგენტო“, რომლის ორგანიზებით იგეგმება ქართული კომპანიების გაეთიანება ტყის სრული რეაბილიტაციისთვის. დაგეგმილი პროექტისთვის შეიქმნა ვებგვერდი – „აღადგინე.გე“. ბორჯომის ეროვნული პარკის ტერიტორიაზე 2008 წელს გაჩენილი ხანძრის შედეგად, 250–მდე ჰექტარზე ტყის საფარი მთლიანად განადგურდა. განადგურებული ტყე კლასიფიკაციის მიხედვით განეკუთვნებოდა უნიკალურ, განსაკუთრებული ფუნქციური დანიშნულების ტყეს, რომლის არსებობა განაპირობებს რეგიონში ეკოლოგიური წონასწორობის შენარჩუნებასა და ეკონომიკურ-სოციალურ განვითარებას. წლების შემდეგ, ეკოლოგიური მდგომარეობა კიდევ უფრო დამძიმებულია, ვერ ხერხდება დაზიანებული უბნების ბუნებრივი განახლება, დამძიმებულია ეროზიული ფონი. ტერიტორიაზე საერთაშორისო და ადგილობრივი ექსპერტების მიერ ჩატარებული კვლევების შედეგად, მდგომარეობა შეფასდა როგორც ეკოლოგიური კატასტროფა. კვლევების მიხედვით, ტყის აღდგენის პროცესში ჩარევის გარეშე, ის ვეღარასდროს დაუბრუნდება პირვანდელ სახეს. ბორჯომის ტყის ტერიტორიაზე ხის დარგვა ნებისმიერ მსურველს კამპანიისთვის სპეციალურად შექმნილი ვებგვერდის საშუალებით შეუძლია. ვებგვერდზე – აღადგინე.გე მომხმარებელი თავად ირჩევს რამდენი ხის დარგვა სურს. ხის დარგვა შესაძლებელია როგორც კომპანიის, ისე ფიზიკური პირის სახელით. კამპანიის ფარგლებში, მომხმარებელს საშუალება აქვს თვალი ადევნოს პროცესს და ყოველდღიურად ვებგვერდზე გადაამოწმოს, რამდენი ხე დაირგო და რამდენი დარჩა ტყის სრულად აღსადგენად. ბორჯომის ეროვნული პარკი ერთ–ერთი უდიდესი პარკია ევროპაში. ტერიტორია ყოველთვის გამოირჩეოდა იშვიათი სახეობის ხეებით და უნიკალური მცენარეებით. პარკის ტერიტორიაზე ბინადრობს „წითელ ნუსხაში“ შესული ცხოველების 8 სახეობა.