22 ივნისს, “ბიას” ორგანიზებით, კახეთის რეგიონში მოქმედ კომპანიებთან შეხვედრა - “ადგილობრივი ბიზნესის გამოწვევები და განვითარების ახალი შესაძლებლობები” გაიმართა. თელავის რაიონში, საქართველოს ბიზნესომბუდსმენთან ერთად გამართულ შეხვედრას 60-მდე კომპანიის წარმომადგენელი დაესწრო.

შეხვედრაზე, “ბიას” წარმომადგენლებმა კახეთის რეგიონში მოქმედ კომპანიებს წარუდგინეს რეგიონის სტატისტიკა და გააცნეს ახალი ტენდენციები და შესაძლებლობები რეგიონალური ბიზნესის განვითარებისთვის. საქართველოს ბიზნესომბუდსმენმა ირაკლი ლექვინაძემ მოწვეულ სტუმრებს ბიზნესომბუდსმენის საქმიანობის შესახებ პრეზენტაცია წარუდგინა.

შეხვედრაზე გაიმართა დისკუსია, სადაც რეგიონალური კომპანიების წარმომადგენლებს საშუალება ჰქონდათ დაესვათ კითხვები ბიზნესომბუდსმენისთვის ადგილობრივი ბიზნესის გამოწვევების შესახებ და მიეღოთ პასუხები მათთვის საინტესესო საკითხებზე.

B Talks-ის ფარგლებში, რეგიონალურ კომპანიებთან შეხვედრა უკვე მესამედ ტარდება. “ბიას” ორგანიზებით, ქუთაისსა და ზუგდიდში წელს გამართულ რეგიონალურ შეხვედრებს 160-მდე კომპანიის წარმომადგენელი დაესწრო. შეხვედრების მიზანია მიაწოდოს საჭირო ინფორმაცია რეგიონალურ კომპანიებს და ხელი შეუწყოს მათ განვითარებას.